RC Chalamila Akutana na Watoa Huduma Binafsi za Afya DSM

Posted on: October 17th, 2023

Mkuu wa Mkoa wa Dar es Salaam Mhe Albert Chalamila leo Oktoba 17,2023 amekutana na watoa huduma binafsi za Afya kwenye Mkutano wa pamoja uliofanyika katika Ukumbi wa Maktaba mpya Chuo Kikuu Cha Dar es Salaam.

RC Chalamila amewapongeza watoa huduma binafsi za Afya katika Mkoa kwa namna wanavyoshirikiana na Serikali kuwahudumia wananchi hususani katika Mkoa huo ambao ni lango kuu kwa ajili ya watu mbalimbali kutoka ndani na nje ya nchi kufuatia Shughuli mbalimbali za kiuchumi na kijamii.

Aidha RC Chalamila amemshukuru Rais Dkt Samia Suluhu kwa sera nzuri ambazo leo zimetuwezesha kuwa hapa na uwekezaji  mkubwa aliofanya na anaendelea kufanya katika sekta ya Afya, ikiwemo uboreshaji wa miundombinu ya Afya, Vifaa tiba, na hata kuwaendeleza kielimu wataalam hadi kufikia taaluma za kibingwa

Vilevile Mkuu wa Mkoa alipata wasaa wa kusikiliza kero na Changamoto mbalimbali ambazo zinaikabili sekta hiyo katika utekelezaji wa majukumu yake ambapo ameahidi kuzifanyia kazi zile zilizoko katika uwezo wake na zile kubwa atawasilisha katika  mamlaka husika kwa Utekelezaji.

Kwa upande wa Mwenyekiti wa APHFTA ( Association of Private Health Facilities in Tanzania) kanda ya Dar es Salaam Dkt Lazaro Wambura amemshukuru mkuu wa Mkoa kwa kuona umuhimu wa kukutana na kundi hilo wamefarijika sana na amewasilisha Changamoto zao kama watoa huduma binafsi za Afya katika Mkoa ikiwemo kutozwa tozo nyingi, na mfuko wa bima kulipa kwa kusuasua.

Mwisho RC Chalamila licha ya kufungua Mkutano huo amewataka washiriki wote kwenda kuelimisha jamii juu ya uwezekano wa kunyesha mvua kubwa za El-Nino kama ilivyotabiliwa na Mamlaka ya Hali ya Hewa (TMA), hivyo wananchi wachukue taadhari