Ujumbe kwa Njia ya Simu Wamfikisha RC Chalamila Kawe

Posted on: February 6th, 2024

Mkuu wa Mkoa wa Dar es Salaam Mhe Albert Chalamila leo Februari 6, 2024 amefika Nyumbani kwa Bi Asha Said mkazi wa Kawe Manispaa ya Kinondoni baada ya kupokea ujumbe kwa njia ya simu ambao alimueleza matatizo yake ya Kiafya ambayo amekuwa akiteseka nayo kwa zaidi ya miaka sita (6)

RC Chalamila katika msafara wake aliambatana na Mganga Mkuu wa Mkoa pamoja na Wataalam wengine wa Afya ambapo alisema Mkoa wa Dar es Salaam kupitia Ofisi yake imejiwekea utaratibu maalum wa kuwafikia watu wenye Changamoto za Afya katika maeneo mbalimbali ya Mkoa huo.

Aidha RC Chalamila amesema Mhe Rais Dkt Samia Suluhu Hassan amekuwa akiguswa na Changamoto mbalimbali za wananchi na amekuwa mstari wa mbele kuzipatia ufumbuzi hasa ukizingatia yeye ni Mama "hivyo ujio wangu hapa ninamwakilisha yeye Mhe Rais Dkt Samia" Alisema RC Chalamila

Vilevile RC Chalamila amemuahakikishia Bi Asha Said kupatiwa matibabu ya figo katika Hospitali ya Mwananyala, pamoja na bima ya Afya pia amempatia mtaji wa kumuwezesha kufanya biashara ndogondogo kwa kua ameonekana kuwa na kipawa cha ususi wa nywele na anauwezo wa kutengeneza mafuta ya Nazi.

Naye Mganga Mkuu wa Mkoa Dkt Mohamed Mang'una amesema Mkoa utaendelea kuwafikia wote wenye uhitaji wa kiafya na Bi Asha Said atapatiwa huduma ya uchujaji wa damu bure katika awamu zote zinazotakiwa.

Ifahamike kuwa Bi Asha Said Amezaliwa na ulemavu wa miguu na kukosa sehemu ya haja kumbwa awali alifanyiwa upasuaji wa kumuwezesha kupata haja kubwa na baadaye akapa Changamoto ya figo ambayo imeendelea kumsumbua hadi sasa hivyo RC Chalamila ametoa rai kwa watu wengine kuyapa kipaumbele matendo ya huruma kwa kuwa ni sadaka.