RC Makalla ni Kiungo Mahiri Timu ya Viongozi wa Dini DSM

Posted on: September 1st, 2021

- Acheza namba '8' timu ya viongozi wa dini dhidi ya wachambuzi wa habari za michezo

- Asema yeye ni kiongozi lazima awe mstari wa mbele, anachokifanya anamaanisha

- Asisitiza watu kufanya mazoezi na kuchanja chanjo ya UVIKO-19

Mkuu wa Mkoa wa Dar es Salaam Mhe Amos Makalla leo Septemba mosi ameonyesha ubora wake katika kusakata kabumbu akiwa kiungo hatari wa timu ya Viongozi wa Dini dhidi ya wachambuzi wa habari za michezo* mechi ambayo imechezwa katika uwanja wa Azam Chamazi na kupelekea kutoka sare ya bao tatu kwa tatu ( 3 - 3).

Akiongea uwanjani hapo Mkuu wa Mkoa amesema michezo ni afya, michezo ni ajira mechi ya leo imekuwa nzuri na hao tulio cheza nao leo tunataka mtanange urudiwe tena.

Aidha akafafanua lengo la mtanange huo ni kuhamasisha wananchi hususani wa Mkoa wa Dar es Salaam kutumia fursa ya kuchanja chanjo ya UVIKO-19.

" Leo mchezo umekuwa na mafanikio makubwa watu wengi wamejitokeza kuchanja toka saa tisa na lengo la mtanange huu ni kuhamasisha jamii kutumia fursa hii ya chanjo, niendelee kutoa rai watu wachanje kama Rais wetu *Mhe Samia Suluhu Hassan* amechanja na mimi na viongozi wenzangu Mkoani tumechanja unasubiri nini" Alisema Mhe Makalla

Aidha Mhe Makalla abainisha kuwa yeye ni muumini wa mazoezi na ndio maana amecheza dakika zote bila kuchoka, hivyo ukiwa kiongozi unapaswa kuwa mstari wa mbele na siku zote kile anachokiongea anamaanisha na leo mmekuwa mashuhuda.

Mtanange huo ulikuwa wa kuvutia huko ukishuhudiwa na waziri wa Afya Mhe Dorothy  Gwajima na Waziri wa  Habari Mhe Innocent Bashugwa na watu wengine maarufu.

Mhe Amos Makalla anaendelea kuhimiza wakazi wa Mkoa wa Dar es Salaam kuendelea kufanya mazoezi kwa kuwa ni Afua mojawapo ya Kupambana na ugonjwa wa UVIKO-19 na magonjwa mengine nyemelezi.