RC Makalla Afungua Mafunzo ya Hati Fungani Dar,

Posted on: September 8th, 2021

- Asema ni mwarobaini wa utekelezaji wa miradi inayokwama kwa kukosa bajeti

- Asisitiza Viongozi katika ngazi za Wilaya kuwa na uelewa wa Hati fungani.

- Asema anataka Mkoa wa Dar es Salaam uwe chuo kwa Mikoa mingine kujifunza Hati fungani

Mkuu wa Mkoa wa Dar es Salaam Mhe Amos Makalla leo Septemba 8, 2021 amefungua kikao kazi cha Siku 3 cha mafunzo ya Hati Fungani kwa Serikali za Mitaa katika Ukumbi wa Anatoglo Ilala Jijini Dar es Salaam.

Mafunzo hayo yanaendeshwa na Wataalam Kutoka TAMISEMI yenye lengo la kuwapa mafunzo Viongozi wa ngazi za Wilaya za Mkoa wa Dar es Salaam hususani Sekretarieti ya Mkoa, Wakuu wa Wilaya, Makatibu tawala wa Wilaya, Wakurugenzi na Wataalam wengine.

Akiongea wakati wa ufunguzi Mhe Makalla amewashukuru TAMISEMI kwa kuandaa mafunzo hayo kwa kuwa ndio utakuwa mwarobaini wa kutekeleza miradi ya Kimkakati katika Halmashauri ambayo ilikuwa inakwama kutokana na ufinyu wa bajeti.

" Kupitia Hati fungani miradi ya maendeleo katika Wilaya hususani ile ya Kimkakati itafadhiliwa, ni imani yangu kuwa Dar es Salaam itakuwa Pilot area" Alisema Mhe Makalla

Aidha Mtaalamu kutoka TAMISEMI Ndg John Cheyo amefafanua kuwa Hati fungani kwa Serikali za Mitaa ni mpya lakini ilikuwa inatekelezwa sana Serikali Kuu kwa kutambua umuhimu wake imeonekana kuna kila sababu ya Kuwa na Hati fungani kwa Serikali za Mitaa.

Kwa kuwa katika Serikali za Mitaa kuna miradi mingi ya maendeleo inayotekelezwa na wakati mwingine inakwama kwa kukosa fedha hivyo kupitia Hati fungani miradi hiyo itafadhiliwa, kitakachohitajika katika mradi husika ni kufanyika kwa upembuzi yakinifu.