RC Chalamila Atinga kwa Kushtukiza Tabata Kimanga

Posted on: June 10th, 2024

-Akagua maendeleo ya barabara ya Tabata Mazda hadi Kimanga 

Mkuu Mkoa wa Dar es Salaam Mhe Albert Chalamila leo Juni 10 ,2024 amefanya ziara ya kushtukiza kukagua maendeleo ya ujenzi wa Barabara ya Mazda kimanga Km 3.7 Wilaya ya Ilala. 

RC Chalamila amefanya ukaguzi huo kufuatia ahadi aliyoitoa kwa wananchi wakati wa mkutano wa hadhara wa kuongea na wananchi wa eneo hilo alioufanya Tabata Kimanga Mei 30,2024.

Mhe Albert Chalamila amemtaka mkandarasi anayejenga barabara hiyo kuongeza kasi ili mradi ukamilike kwa wakati, wananchi wa maeneo hayo waweze kuitumia katika shughuli zao za kila siku za kujiletea kipato. 

Aidha RC Chalamila amesema Rais Dkt Samia ameelekeza nguvu kubwa katika kuboresha miundombinu ya barabara katika maeneo mbalimbali hapa nchini hususani Mkoa huu, “Niwatake makandarasi waliobahatika kupata kazi kufanya kazi kwa weledi kuzingatia muda na thamani ya pesa “ Alisema RC Chalamila Vilevile RC Chalamila ametoa rai kwa wananchi kuendelea kuelimishana juu ya kutoziba mifereji ya maji taka pia kutotupa taka ovyo ambazo huchangia kwa kiasi kikubwa kuziba mifumo ya maji taka 

Sanjari na hilo RC Chalamila amewataka wananchi kutokuwa na shaka kuhusu kusua kusua kwa ujenzi wa barabara hiyo ambapo amesema atakuwa anafuatilia kwa karibu maendeleo ya barabara hiyo pale atakapoona kuna shida atachukua hatua stahiki mara mmoja 

Mwisho RC Chalamila ametoa rai kwa wananchi kuendelea kulinda amani ya Mkoa wa Dar es Salaam kwa kuwa ndicho kitovu cha uchumi wa nchi, Diplomasia na mambo mengine mengi yenye maslahi mapana kwa nut mmoja mmoja, Taifa la Tanzania, na mataifa mengine Duniani