RC Chalamila Akabidhi Viti vya Watu Wenye Mahitaji Maalum Zaidi ya 18

Posted on: June 26th, 2023

- Amshukuru *Mtendaji Mkuu wa KC Global Tanzania LTD Ndg Chris Lukosi kwa moyo wake wa kipekee wa kutoa msaada huo bure*

-Amesema Rais Dkt Samia tayari ameshatoa maelekezo ya kuwa na data za watu wenye ulemavu ili mikopo inayotolewa na Serikali ianze kuwanufaisha wao

Mkuu wa Mkoa wa Dar es Salaam Mhe Albert Chalamila leo Juni 26, 2023 amekabidhi viti vya watu wenye mahitaji maalum (wheel Chair) zaidi ya 18 msaada ambao umetolewa na Mkurugenzi Mtendaji wa KC Global Tanzania LTD baada ya kupokea ombi hilo kutoka kwa Mkuu wa Mkoa Mhe Chalamila.

Akikabidhi "wheel Chair" hizo katika viwanja vya ofisi ya KC Global Tanzania LTD Salasala Halmashauri ya Manispaa ya Kinondoni amemshukuru sana Ndg Chris Lukosi kwa moyo wake wa kiungwana wa kujali kundi hili lenye uhitaji kwa kuwa makundi hayo yamekuwa yakikabiliwa na Changamoto kubwa sana kutokana maumbile yao hivyo kupitia msaada huo unakwenda kurahisisha maisha yao ya kila siku.

Aidha Mhe Albert Chalamila amesema Mhe Rais Dkt Samia Suluhu Hassan anatambua makundi hayo yenye uhitaji maalum tayari ameshaelekeza kuandaa data za watu wenye ulemavu ili fursa za mikopo zinazotolewa na Serikali wanufaika wa kwanza wawe ni watu hao wenye ulemavu.

Kwa Upande wa Mtendaji Mkuu wa KC Global Tanzania LTD Ndg Chris Lukosi amemhakikishia mkuu wa Mkoa kuendelea kuwasaidia watu hao wenye ulemavu, siku za usoni anatarajia kuleta viti vya watu wenye mahitaji maalum zaidi ya 15 ambapo wale wote waliokosa leo watapatiwa viti hivyo.

Ifahamike kuwa KC Global Tanzania LTD ni kampuni ya kizalendo inayojihusisha na uuzaji wa magari ya aina mbalimbali ambayo Ofisi yake hapa nchoni iko Salasala Wilaya ya Kinondoni Jijini Dar es Salaam