RC Chalamila Afanya Ziara Jimbo la Mbagala-Temeke

Posted on: February 19th, 2024

- Atembelea miradi lukuki, asikiliza na kutatua kero za wananchi
Mkuu wa Mkoa wa Dar es Salaam Mhe Albert Chalamila leo Februari 19,2024 ameanza ziara yake rasmi katika Wilaya ya Temeke Jimbo la Mbagala ikiwa ni mwazo wa ziara yake ya kutembelea Wilaya zote za Mkoa huo.
Akiwa katika Wilaya ya Temeke RC Chalamila ameweka jiwe la msingi ujenzi wa Shule mpya ya Mangaya Sekondari ya ghorofa 3, ametembelea ujenzi wa ghorofa 6 Hospitali ya Mbagala Rangi tatu, mradi wa upanuzi wa kituo cha kupooza umeme na barabara ya Chamazi Sekondari KM 0.20 kwa kiwango cha Zege.
Aidha baada ya kutembelea miradi hiyo RC Chalamila ameelekeza kutoa kipaumbele kwa makandarasi wazawa wanaofanya vizuri wakipewa kazi, vilevile alipata wasaa wa kufanya mkutano wa hadhara katika viwanja vya Shule ya msingi Misufini Chamazi.

Sambamba na hilo RC Chalamila akiwa ameambatana na wataalam mbalimbali alitoa fursa kwa  wananchi kueleza kero zinazowakabili mbele yake na kuzipatia majawabu papo hapo.Miongoni mwa kero silizosemwa na Wananchi ni kero za kukatika kwa umeme mara kwa mara, kuwekewa alama za kubomolewa nyumba na TANROAD, TASSAF, kero ya urasimishaji wa Ardhi na nyingine nyingi ambapo zote zilipatiwa majibu yaliyorudisha tabasamu kwa wananchi wa Jimbo hilo.
Ifahamike kuwa kesho Februari 20,2024, RC Chalamila ataendelea na ziara ya kutembelea miradi ya maendeleo, kusikiliza na kutatua kero za wananchi katika Wilaya hiyo Jimbo la Temeke