Kamati ya Uchunguzi wa Tukio la Moto Mnadani- Kariakoo Yabaini Chanzo

Posted on: October 20th, 2023

Mkuu wa Mkoa wa Dar es Salaam *Mhe Albert Chalamila* leo Oktoba 20,2023 ametoa taarifa ya kamati aliyounda kuchunguza tukio la Janga la moto lililotokea eneo la Mnadani Kariakoo mnamo Oktoba 1, 2023

RC Chalamila amesema kamati hiyo imefanya kazi ya Uchunguzi ndani ya siku saba (7) kuanzia Oktoba 07, 2023 na kubaini chanzo cha moto huo sio ajali bali ni HUJUMA ndani ya wafanyabishara wa Mnadani Kariakoo ambapo ameziagiza Mamlaka husika kuwabaini watu hao na kuwachukulia hatua Stahiki za kisheria.

Uchunguzi huo umehusisha ukaguzi wa eneo la tukio, kufanya mahojiano na mashuhuda, wamiliki wa majengo yanayozunguka eneo hilo, wafanyabishara,walinzi wa zamu na picha za kamera zilizorekodi tukio hilo kabla na baada ya tukio la moto huo

Aidha kamati imetoa mapendekezo na ushauri ikiwemo wafanyabishara kutafutiwa eneo mbadala la kuweza kuendesha Shughuli kutokana na aina ya biashara zao kwa kuzingatia maelekezo ya wataalam,pia Halmashauri kusimamia sheria za mipango miji kwa mfano kuacha njia moja kati ya jengo moja na jingine pia waliokua wanaziba njia watambuliwe na kuchukuliwa hatua za kisheria, BRELA  ifanye mapitio ya  Kampuni ya The Kariakoo Auction Mart Co Ltd ili kupata uhalali wa umiliki na namna ya uendeshaji wa Kampuni hiyo.

Hata hivyo kufuatia janga hilo la moto kamati imebaini kusababisha madhara kadhaa ikiwemo kuungua na kuteketea kwa eneo lote la biashara la Mnadani vibanda vya biashara zaidi ya 550 pamoja na mali zikiwemo maduka/ fremu kumi (10) majengo marefu Saba( 7) yaliyozunguka eneo hilo kwa upande wa athari za kibinamu hakukuwa na kifo chochote, bali kulitokea majeruhi ya watu sita (6) kati yao watu wazima watano (5) na mtoto mmoja (1)