Waziri Lukuvi Ashuhudia Mafanikio Lukuki Ubungo

Posted on: September 18th, 2024

Waziri wa Nchi, Ofisi ya Waziri Mkuu ( Sera,Bunge na Uratibu )Mhe. William Lukuvi Leo Septemba 18,2024 ameanza rasmi ziara Mkoa wa Dar es salaam Wilaya ya Ubungo ambapo ametembelea na kukagua miradi mbalimbali inayotekelezwa ndani ya Wilaya hiyo ikiwemo miradi ya Maji na Afya.

Mhe. Lukuvi akiwa kwenye ziara hiyo amekagua mradi wa ujenzi wa tenki kubwa la maji eneo la Mshikamano Mbezi, mradi ambao umetekelezwa kwa zaidi ya Bilioni 4 ambao unahudumia zaidi ya watu Laki mbili katika Wilaya hiyo, hivyo kuondoa kero ya muda mrefu ya ukosefu wa maji vilevile amekagua kituo Cha Afya Kimara Saranga ambapo amependezwa na utekelezaji wa mradi huo. "Shukurani nyingi kwa Mheshimiwa Dkt. Samia Suluhu Hassan, huduma katika sekta ya Afya Wilaya ya Ubungo inapatikana kwa asilimia 100." Alisisitiza Lukuvi.

Aidha Mhe. Waziri Lukuvi akiwa kwenye mkutano wa hadhara na wananchi Viwanja vya Barafu Kata ya Mburahati-Ubungo amepata wasaa wa kuwasikiliza viongozi mbalimbali katika mkutano huo na kushuhudia yale aliyokagua na kusema kuwa mabadiliko haya ni makubwa sana ikijumuishwa na miundombinu ya barabara itakayomalizika kujengwa ndani ya muda mfupi.

Sambamba na hilo Mhe. Waziri Lukuvi ameahidi kwa kushirikiana na uongozi wa Mkoa wa Dar es salaam kuendelea kuwaonesha watanzania miradi yote iliyotekelezwa chini ya Serikali ya awamu ya Sita pamoja na kutoa fursa kwa wananchi waeleze na kutoa maoni ni kwa namna gani wamekuwa wakinufaika na miradi hiyo mfano Maji, Hospitali, Elimu na mengineyo.

Kwa upande wa Katibu Tawala wa Mkoa wa Dar es salaam Dkt. Toba Nguvila amemuhakikishia Waziri Lukuvi kuwa hali ya Usalama ya Mkoa ni shwari, una amani kubwa na hali ya utulivu, vilevile wananchi wa Mkoa wa Dar es salaam wanafanya kazi hasa za biashara ikiwa ni zaidi ya asilimia 90 ni wafanyabiashara  pia utekelezaji wa miundombinu katika sekta mbalimbali ni jambo endelevu na lenye kuleta mafanikio makubwa.

Mwisho ifahamike kuwa ziara ya kuelezea mafanikio ya Mheshimiwa Raisi Dkt. Samia Suluhu Hassan ni endelevu, imeanza Wilaya ya Ubungo na itaendelea Wilaya zingine zote za Mkoa wa Dar es salaam