RC Makalla Azindua Kituo cha Mawasiliano Taasisi ya Saratani Ocean Road

Posted on: February 4th, 2023

-Amshukuru Rais Dkt Samia kwa kuendelea kuboresha huduma za afya katika Taasisi ya Ocean Road

-Apongeza Benki ya CRDB kwa kuwezesha kituo cha Mawasiliano cha huduma kwa wateja

- Atoa wito kwa wananchi kufanya mazoezi, kupima Afya na kuzingatia Lishe bora

Mkuu wa Mkoa wa Dar es Salaam CPA Amos Makalla leo Februari 4, 2023 amezindua kituo cha Mawasiliano cha huduma kwa wateja katika Taasisi ya Ocean Road Jijini Dar es Salaam ambacho kimefadhiliwa na Benki ya CRDB

CPA Makalla kabla ya Uzinduzi huo ameshiriki matembezi ya takribani KM 3.5, kuhamasisha jamii kufanya mazoezi lakini pia kuungana na Wananchi wote Duniani kuadhimisha Siku ya Saratani

Aidha CPA Makalla amemshukuru Rais Dkt Samia Suluhu Hassan kwa jitihada yake kubwa katika kuboresha huduma za Afya nchini hususani Mkoa wa Dar es Salaam ambapo Taasisi ya Ocean Road ameendelea kuiwezesha fedha nyingi kwa ajili ya kuboresha miundo mbinu, vifaa tiba pamoja na matibabu bure kwa wagonjwa wa Saratani

Vilevile CPA Makalla ameipongeza Benki ya CRDB kwa kuwezesha Taasisi ya Saratani ya Ocean Road Kituo cha kisasa cha Mawasiliano cha kutoa huduma kwa wateja ambapo sasa mteja anaweza kupata elimu ya Afya au Ushauri kwa kupiga simu popote alipo masaa 24 pia CPA Makalla amepongeza CRDB BANK MARATHON kwa kutekeleza maksudio yake ya kukusanya fedha ambazo zimesaidia kuboresha huduma za Afya katika Taasisi ya Ocean Road

Hata hivyo CPA Amos Makalla ametoa wito kwa wananchi kujenga tabia ya kupima Afya, kufanya mazoezi na kuzingatia Lishe bora ili kuepuka magonjwa yasiyo ambukiza