RC Chalamila"Jotokezeni kwa Wingi Kupiga Kura Oktoba 29,2025, Dar ni Salama Sana"

Posted on: October 27th, 2025

Mkuu wa Mkoa wa Dar es Salaam Mhe Albert Chalamila amewataka wananchi wakazi wa Mkoa huo kupuuza taarifa za uzushi zinazotolewa na baadhi ya watu kupitia mitandao ya kijamii kuwa uchaguzi utakua na vurugu badala yake wajitokeze kwa wingi kupiga kura kwani Mkoa huo uko Salama sana wakati wote kabla ya uchaguzi,wakati wa uchaguzi na baada ya uchaguzi

Akizungumza Jijini Dar es Salaam katika mkutano na waandishi wa habari RC Chalamila amesema Mkoa huo una wapiga kura zaidi milioni nne na kwamba tayari  tume Huru ya Taifa ya Uchaguzi imeshakamilisha miundombinu kwa ajili ya wananchi  kupigia kura ndani ya Mkoa huo hivyo amewataka wananchi kujitokeza kupiga kura bila kuhofia usalama wao kwani vyombo vya ulinzi vimejipanga vizuri kuimarisha amani

Aidha RC Chalamila amevionya vikundi vinavyotishia kuvuruga wakati wa uchaguzi kupitia mitandao ya kijamii na kubainisha kuwa vyombo vya dola viko macho kuchukua hatua dhidi ya mtu anayebainika kufanya au kutaka kuleta vurugu na amewataka wananchi kutoa taarifa kwa vyombo vya dola endapo kuna viashiria vya vurugu

Ameongeza kuwa Serikali imejipanga kikamilifu kuhakikisha kila mwananchi anapata nafasi ya kutumia haki yake ya kikatiba ya kupiga kura bila hofu wala vurugu kwakua Serikali inatambua kuwa suala hilo ni haki ya kikatiba

Pamoja na mambo mengine Chalamila amevitaka vyombo vya habari kufanya kazi kwa weledi bila kufanya upotoshaji kwani vyombo vya habari ni muhimuli muhimu ambao ni kiunganishi kati ya wananchi na Serikali yao ambapo ametumia pia nafasi hiyo kuwataka viongozi kuanzia ngazi ya mitaa kulinda miundombinu ya Serikali ikiwemo ya umeme na barabara za mwendokasi ambapo amisisitiza barabara hizo kutotumiwa na vyombo vingine vya usafiri