RC Chalamila Akabidhi Pikipiki 30 Jeshi la Polisi- DSM

Posted on: October 7th, 2024

Katika hatua ya kuimarisha ulinzi na usalama katika Mkoa wa Dar es Salaam, Mkuu wa Mkoa Mhe Albert Chalamila Leo Oktoba 7,2024 amekabidhi pikipiki 30 kwa vyombo vya dola katika hafla iliyofanyika eneo la Police Mess na kuhudhuriwa na viongozi mbalimbali wakiwemo wakuu wa wilaya,Makatibu Tawala wa Wilaya,Viongozi mbalimbali wa Dola na Wakurugenzi wa Taasisi mbalimbali za Serikali.

Akizungumza katika hafla hiyo, Mhe. Chalamila amewashukuru sana vyombo vya dola kwa kazi kubwa na nzuri wanayoifanya katika kulinda usalama wa wananchi, hasa katika kipindi hiki ambacho nchi inaelekea kwenye uchaguzi wa Serikali za mitaa ambapo amesisitiza Polisi kuendelea kusimamia usalama ili Tanzania hususani Dar es salaam kuendelea kuwa kisiwa cha Amani.

Aidha, RC Chalamila amewataka wananchi wote kujitokeza kwa wingi kujiandikisha kwenye daftari la wapiga kura tarehe 11 Oktoba 2024 ili waweze kushiriki kikamilifu katika uchaguzi wa Serikali za mitaa utakaoanza tarehe 27 Novemba 2024. Amesema kuwa ushiriki wa wananchi katika uchaguzi ni muhimu sana kwa kuimarisha demokrasia na maendeleo ya Nchi.

Vilevile RC Chalamila amewashukuru sana Wakuu wa Wilaya na Wakurugenzi wa Taasisi mbalimbali kama vile TPA, TCRA na DAWASA kwa ushirikiano mkubwa waliouonesha katika kufanikisha ugawaji wa pikipiki hizo ambapo amesema kuwa ushirikiano huu ni muhimu sana kwa ajiri ya maendeleo katika Mkoa.

Kwa upande wao, Viongozi wa vyombo vya dola wameshukuru na kuahidi kutumia vizuri pikipiki hizo katika kuongeza ufanisi kwenye majukumu yao ikiwemo kuimarisha ulinzi na usalama Mkoani humo.

Naye Meya wa Halmashauri ya Kinondoni Bw. Songoro Mnyonge amemshukuru Mkuu wa Mkoa wa Dar es Salaam kwa kuwa pamoja na kuwa na ushirikiano wa namna ya kuweza kupata maendeleo na utulivu.

Mwisho Mhe.Chalamila ameahidi kuendelea kutoa pikipiki hizo na magari kwa siku za usoni pia amewakumbusha maaskari wote umuhimu wa kuwekeza sehemu ya fedha wanazopata ili kuweza kujikwamua kiuchumi, amesema kuwekeza ni njia moja nzuri ya kuhakikisha kuwa maisha yao yanakuwa bora zaidi.