MKOA WA DAR ES SALAAM KINARA UTOAJI WA HABARI KWA UMMA 2024

Posted on: June 25th, 2024

 -RC chalamila apongeza kitengo cha mawasiliano Serikalini kwa kupatiwa tuzo ya ushindi

-Atoa maelekezo mahususi kuboresha utendaji kazi wa kitengo hicho

Mkuu wa Mkoa wa Dar es Salaam Mhe Albert Chalamila leo Juni 25,2024 amekabidhi tuzo na cheti cha ushindi kwa kitengo cha mawasiliano serikalini kupitia katibu Tawala wa Mkoa huo Dkt Toba Nguvila tuzo ambayo ilitolewa wakati wa kongamano la sekta ya habari na kikao cha maafisa Habari, Mawasiliano na Uhusiano Serikalini kilichofanyaika katika ukumbi wa Mlimani City Jijini Dar es Salaam Juni 18-22,2024, ambapo mgeni rasmi alikuwa Rais wa Jamhuri ya Muungano wa Tanzania Mhe,Dkt Samia Suluhu Hassan

RC Chalamila akikabidhi tuzo hiyo katika ukumbi wa mikutano wa ofisi hiyo ametoa pongezi kwa kitengo cha mawasiliano Serikalini na watumishi wote wa ofisi yake na kuwataka kuendelea kufanya kazi kwa bidii na weledi mkubwa, ambapo amemuagiza Katibu Tawala wa Mkoa kukipatia gari na vifaa vya kisasa kitengo cha mawasiliano ili kiweze kufanya kazi kwa ufanisi Zaidi.

Kwa upande wa Katibu Tawala wa mkoa Dkt Toba Nguvila amemuhakikishia mkuu wa mkoa kuendelea kusimamia wataalam katika mkoa huo kwa weledi mkubwa ili kuwa na utumishi wenye tija kwa mkoa na Taifa kwa ujumla.

Aidha tuzo na vyeti hivyo wakati wa kongamano la sekta ya habari vilitolewa katika makundi manne (4), kundi la Wizara kwa wizara 10, Kundi la Mamlaka za Maji 10, kundi la Mikoa 10 na kundi la Wilaya 20 zilizofanya vizuri ambapo Mkoa wa Dar es Salaam umeibuka kinara kwa kishika nafasi ya kwanza(1) kati ya mikoa yote ya Tanzania bara kwa kufanya vizuri katika kutoa habari kwa Umma.

Pia Mkoa wa pili (2) ni Mwanza, tatu (3) Arusha, nne(4) Dodoma, tano(5) Ruvuma, sita(6) Pwani, saba(7) Morogoro, nane(8) Kilimanjaro, tisa(9) Tanga na Mkoa wa kumi(10) Njombe.

Sanjari na hilo katika kundi la Wilaya bado Dar es Salaam imefanya vizuri ambapo Wilaya ya Temeke imeshika nafasi ya kwanza (1), Ilala nafasi ya 4, Ubungo ya 5, Kinondoni ya 17 na Kigamboni nafasi ya 20 kati ya Wilaya zote za Tanzania bara.

Mwisho hafla ya makabidhiano ya tuzo na cheti ilihudhuriwa na wakuu wa idara na vitengo, watumishi wa ofisi ya Mkuu wa Mkoa makao makuu na watumishi wengine kutoka katika wilaya zote za mkoa huo.